Güei en Vero, actu contra la ignominia del silencio y l’olvidu

Cuando se noma a daquién puédese cometer la inxusticia de la omisión involuntaria, pero lo realmente grave ye la invisibilización forzosa y antemanada, como asocedió con toles persones represaliaes y fusilaes na guerra civil, nel  ignominioso silenciu y el ignominioso olvidu al que fueron sometías por aquel ignominioso réxime que siguió a la República.

Nun día como güei, esos asesinatos –los físicos y el de la memoria- clamen por poner puntu y final a les décades d’olvidu. Por eso, nesti artículu lo que quiero ye destacar la necesidá de xusticia, verdá y «reparación» pa toos aquellos represaliaos d’España y, equí, especialmente, de Samartín del Rei Aurelio y de la parroquia de la Hijuela o Santa Bárbola, onde a bien de persones, más d’un centenar, arrampuñáron-yos la vida na posguerra, ensin que l’amnesia impuesta pol franquismu y los sos herederos pudiera borrar los sos nomes, les sos hestories y el so sacrificiu. Un silenciu y una represión que buscaba amedranar y apavorar a tolos que’l réxime catalogaba de “desafectos”, un primer pasu pa la so deshumanización, necesaria pa la so tortura o desapaición.

Los monolitos que s’inauguren güei representen, pa mi, el nome d’estes persones, el d’elles y el de toes aquelles que como a elles arrampuñáron-yos la vida, la mayoría en plena mocedá, condergándoles a la invisibilidá y a les sos families a la lacerante situación de desafectos a un réxime xenocida, arguyosos de selo, que con ello clasificaba pa una forma d’esterminiu físicu o segregación civil.

Nel Bescón de Ludivina asesinaron a 4 persones, dos d’elles -Alfredo Llaneza González, “El GItano”; y José García Alvarez, “Barrendero”- siguen soterraes ellí mesmu. Unos metros más embaxo, nel Granxu, ta soterráu’l mio tíu, Arsenio González Llaneza, “El Llargu”; y nel campusantu, sumíos yá los sos restos, ta’l d’El Batán, Julio Rozada Calleja, “El Chore”.

Nel Xerru Vayuetu ta la tumba de Mario Llaneza Rozada, l’otru Gitano, fíu del asesináu del Bescón, que perdió la vida allá de primeres de los 50, como los sos otros dos hermanos y munchos parientes más.

Por ellos y les sos families, güei tenemos de celebrar estos monolitos como parte de la verdá, de la xusticia y de la «reparación». Izquierda Xunida d’Asturies empeñárase nello mientres la so presencia nel Gobiernu d’Asturies, con un inxustu costu políticu y personal pero que, a la fin, como agora, la verdá va resplandir. Ye de xusticia.

Manuel González Orviz.                                                                                           

Coordinador d’IX d’Asturies.                                                                                     

Rojo  y republicanu.